2008-ին փետրվարի 19-ի Հայաստանի Հանրապետության Նախագահի ընտրություններից հետո սրված քաղաքական իրավիճակը իր գագաթնակետին հասավ մարտի 1-ին։ 2008թ Հայաստանում գարնան առաջին լուրն եղավ սարսափազդու. ոստիկանները Օպերայի հրապարակում հարձակվել էին խաղաղ ցուցարարների վրա եւ ցրել դաժանաբար։ Օրվա ավարտն ավելի դաժան էր։ Այդ օրը ոստիկանները զենք կիրառեցին Երեւանի կենտրոն դուրս եկած խաղաղ ցուցարարների վրա, որոնք բողոքում էին ընտրությունների արդյունքներից` հայտարարելով, որ դրանք ուղեկցվել են բռնություններով, ծեծուջարդով, լցոնումներով, թվանկարչությամբ։ 2008թ մարտի 1-ին Հայաստանի մայրաքաղաքի կենտրոնում զոհվեցին 10 հոգի` 8 ցուցարար եւ 2 ոստիկան, վիրավորվեցին ավելի քան 200 հոգի։ Երկրում գործող նախագահ Ռոբերտ Քոչարյանի կողմից հայտարարվեց 20-օրյա արտակարգ դրություն` լրատվամիջոցների գործունեության սահմանափակմամբ։ Ողբերգությունից մեկ տարի անց Human Rights Watch հեղինակավոր իրավապաշտպան կազմակերպությունը նշում է. «Հայաստանը դեռ պետք է պատասխանատվության կանչի ոստիկանությանը ոչ համաչափ ուժի կիրառման համար ցուցարարների հետ բախումներից մեկ տարի անց, որի արդյունքում առնվազն 10 մարդ զոհվեց»։ 2008 թվականի մարտի 1-2-ին Երեւանում տեղի ունեցած զանգվածային անկարգությունների կապակցությամբ հարուցված քրեական գործով մեղադրանք է առաջադրվել 140 անձի, որից 26-ի նկատմամբ նախաքննության ընթացքում դադարեցվել է քրեական հետապնդումը եւ նրանց մասով քրեական գործերը կարճվել են։ Մարտի 1-ի քրեական գործի շրջանակներում դատարան է ուղարկվել 90 գործ՝ 111 անձի վերաբերյալ։ 87 գործով 101 անձի վերաբերյալ կայացել են դատական որոշումներ։ Նրանցից հինգը արդարացվել է։ 2 անձի դեպքում դատախազը հրաժարվել է մեղադրանքից։ 52 անձ ազատազրկման է դատապարտվել, որից 5-ը տուգանվել են, 38 հոգու դեպքում` պատիժը պայմանական է կիրառվում, իսկ մեկը ազատ է արձակվել, քանի որ տուժողը հաշտվել է նրա հետ։Մարտիմեկյան դեպքերից հետո գրեթե 85 մարդ անազատության մեջ է հայտնվել միայն Քր. Օր. 300 եւ 225 հոդվածներով։ Դրանք այն հոդվածներն են, որ ԵԽԽՎ-ն իր հունվարի 27-ին ընդունած 1643 բանաձեւով պահանջում է վերանայել, իսկ ԱԺ նախագահը խոստացել է այդ անել հնարավորինս արագ։ «Վեհաժողովը նշում է, որ ըստ Հայաստանի Սահմանադրության, օրենքում որեւէ դրական փոփոխություն հետադարձ ուժ կունենա 2008թ. մարտի 1-2-ի դեպքերի հետ կապված անազատության մեջ հայտնված անձանց դեմ առաջադրած մեղադրանքների դեմ»,- ասված է բանաձեւում։ Իսկ ըստ դատախազության ներկայացրած տվյալների 300 եւ 225 հոդվածներով մեղադրվողների թիվը հստակ է` «7-ի գործով» անցնող 7 քաղաքացիները եւ եւս 7 հոգի, որոնց դեմ հարուցված գործերը կարճվել են։ Վերջին յոթի շարքում են «Հանրապետություն» կուսակցության նախագահ Արամ Սարգսյանը, ՀՀՇ նախագահ Արարատ Զուրաբյանը, ԱԺ նախկին փոխնախագահ Կարապետ Ռուբինյանը, ԱԱԾ պետի նախկին տեղակալ Գուրգեն Եղիազարյանը, գլխավոր դատախազի տեղակալ Գագիկ Ջհանգիրյանը, կալանավայրերի վարչության նախկին պետ Մուշեղ Սաղաթելյան եւ այլն։ Ինչ վերաբերվում է 225 հոդվածին, ապա բազմաթիվ գործերով արդեն վճիռներ կան հրապարակված։ Ըստ ՀՀ գլխավոր դատախազության տեղեկատվության` 225 հոդվածով դատարան են մտել 70 գործ, սակայն դրանց մեջ կան գործեր, որոնք որակավորվել ու փոփոխվել են։ Արդեն իսկ Քր. Օր. 225 հոդվածի տարբեր մասերով մեղավոր են ճանաչվել 23 մարդ, իսկ 7 մարդու գործ դեռ լսվում է դատարաններում։ Ի դեպ, 225 հոդվածով մեղավոր ճանաչվածների մեծամասնությանը դատարանները պայմանական ազատ են արձակել։ Իսկ պատժաչափերը սկսվում են մեկ տարուց մինչեւ 6.5 տարի։ Հայաստանում մարտիմեկյան ողբերգությունից եւ ճգնաժամից անցել է մեկ տարի սակայն դեռ լույս չի երեւում…

RSS feed!

Ավազակապետություն, Համաժողովրդական Շարժում