Նախորդ դարի 90-ականներին նորանկախ Հայաստանի իշխանությունների երեւի թե ամենալուրջ բացթողումն այն էր, որ չդրսեւորվեց քաղաքական կամք` գաղտնազերծելու մեր կողքով քայլող եւ մեր թիկունքում ապրող խորհրդային ԿԳԲ-ի գործակալներին:

Այդ քայլով, որը հաջողությամբ իրականացվել է այլ /մասնավորապես, բալթյան/ երկրներում, մեր հասարակությունը կմաքրազտվեր: Երկրի բարձրագույն պաշտոնները չէին վստահվի օտար պետությունների հատուկ ծառայություններին սպասարկող անձանց: Անկախ Հայաստանի ԱԱԾ-ն չէր վերածվի նախկին ԿԳԲ-ի հոգեւոր ժառանգորդի, այլ կձեւավորվեր նորովի` ազգային արժեքների հիման վրա: Այլ` ոչ բերիական կլինեին նաեւ նրա գործելաոճը, կիրառվող մեթոդները: Հենց նույն ԿԳԲ-ի գործակալները, իրենց անունների հրապարակումից հետո, նույնպես կզգային թեթեւացում եւ չէին դառնա մինչ օրս ձգվող շանտաժի ու կոմպրոմատի զոհ: Զոհ ու գերի` ինչպես Հայաստանի հանցավոր վարչախմբի, այնպես էլ օտարերկրյա հատուկ ծառայությունների:

Նույն նկատառումներից ելնելով, չէմ ողջունում այն հանգամանքը, որ նույն 90-ականներին իշխանությունները լայնորեն օգտվում էին նախկին կոմկուսական նոմենկլատուրայի ծառայություններից: Այդ պրակտիկան ծնեց վախվորած սահմանադրախախտ գագիկ հարությունյաններ, քրիստոնեաբար թալանող խոսրով հարությունյաններ … Էլ չեմ խոսում մանր-մունր պարտկոմների եւ շրջկոմի օգնականի օգնականների մասին: Ի դեպ, այդ մարդիկ, որ պաշտոն էին մուրում ՀՀՇ ղեկավարությունից, ոչ ֆորմալ հանդիպումների ընթացքում եւ իրենց շրջապատում ատելություն էին սերմանում նույն ՀՀՇ եւ դրա դավանած արժեքների հանդեպ: Եվ այդ վայրահաչությունը շարունակվում է մինչ օրս, բայց արդեն` անթաքույց: Նման մարդիկ ստրկամտորեն ծառայում են ցանկացած իշխանության, իսկ այսօր դարձել են ավազակապետության հուսալի հենարանը:

Մեծարգո Նախագահ Տեր-Պետրոսյան, առաջարկում եմ մեր արդար պայքարում հաղթանակելուց եւ ազատությունը վերագտնելուց հետո առաջին իսկ հրամանագրերից մեկով գաղտնազերծել մինչեւ անկախացումը խորհրդային ԿԳԲ-ի հայաստանաբնակ գործակալների անունները: Համոզված եմ, որ դա ամենեւին չի հակասում մեր երկրի անվտանգության շահերին եւ չի վտանգում ներկայիս ԱԱԾ աշխատանքները:

Հ.Գ. Խորհրդային ԿԳԲ-ի հետ համագործակցողների շարքերում իր ուրույն տեղն է զբաղեցնում ավանդական դաշնակցական վերնախավը: Օտար ուժերին ապավինելու վերաբերյալ Համաժողովրդական շարժման մասին հեքիաթներ հորինելու ու լկտիաբար ստելու փոխարեն, ինքնագրգիռ Հրանտ Մարգարյանին խորհուրդ եմ տալիս դուրս գալ բիոցիտոզային վիճակից եւ անդրադառնալ արդի դաշնակցական գործիչների կենսագրությանը: Շարքային դաշնակցականների գաղափարականությունը հարգելով հանդերձ, չի կարելի չհիշել այն անհերքելի իրողությանը, որ 90-ականներին ՀՅԴ-ն օտար ափերից կառավարվող կառույց էր:

RSS feed!

Ավազակապետություն, ԴԱՎԻԹ Կ.